جرت وأخطيت

الله يجازيك ياللي رحت واقفيت
اقفاية اللي يسمونه جلاوي
من رحت عني وأنا لك ما تحريت
ولاني على ما جرالي منك قاوي
أنا أشهد إنك عليه جرت وأخطيت
ماهو كلام الهواوي للهواي
ولعتني فيك لين إنك تساويت
وطعنتني طعنة اللي ما يداوي
في وقت ما ينفع المجروح ياليت
ولا عاد به لاحقوق ولا عزاوي
صدوا هله عن حقوقه وأنت صديت
هالوقت في كل مذهب ما يساوي
على العموم أنت يا للي رحت ما جيت
ليت الهقاوي تعيش بلا هقاوي
وليتك قبل ما تروح شوى مريت
ما هوب من شان نحسب بالتساوي
من شان أعلمك علم له تمنيت
إنك سمعته قبل ذيك الدعاوي
قبل يفوق الخطا حجم التناهيت
يوم إن للبوح في صمته حراوي
الله يجازيك تدري ويش سويت
صرفتني غصب عن كل المناوي