بمناسبة زيارة صاحب السمو الملكي

الأمير سلطان بن عبدالعزيز آل سعود لمنطقة الدوادمي د محمد ثواب الروقي - الدوادمي

عد رعّاد المزون وعد برّاق سرى
وعد ما تذري الهبايب من يسار ومن يمين
وعد من صلى ببيت الله وزار أم القرى
وعد ناسٍ في المساجد راكعين وساجدين
مرحباً حييت يا سلطان يا ليث ضرى
بالفعول الطيبه في كل وقت وكل حين
في قدومك يالأمير أعتز دايم وافخرى
فرحةٍٍ ما تنتوصف ساسها ساسٍ متين
السعد غنت طيوره في المدينة والقرى
يوم جيتو يم داوردالندية زايرين
حبكم يا سيدي وسط الضماير قد سرى
ما نمله لو بقا يمشي على طول السنين
انت ابن صقر الجزيرة ما به اللي ما درى
نايب وحد بلدنا من شرور الحاسدين
ماحدٍ يجهل فعوله غير طفلٍ ما جرى
من ذراعه ضربته تودع القاسي يلين
باقي فعله على طول الزمان مسطرى
الشجيع بن الشجيع الي مشى درب اليقين
طالبينك ترحمه يالله بيوم المحشرى
واسكنه في جنة الفردوس يالرب المعين
والفهد خله لنا حيثه لنا حيد وذرى
نطلبك تحميه يا رب الملا من كل عين
في ذرى الله ثم ذراكم طاب للعين الكرى
يشهد الوالي على ما اقول خير الشاهدين
ها ضني هاجوس فكري يوم في بالي طرى
لين صخرت القوافي من هجوس في الكنين
فاح شعري وانتثر طيبٍ ومسك وعنبرى
للأمير اللي مجيه يسعد القلب الحزين