صادق الود

وخلك سموح وكل شيٍ بحده
ومن لا توده ابتسم له وداريه
ومن لا يودك لا توسل لوده
واللي يودك وانت بالود شاريه
بده بصافي صادق الود بده
واللي هجرك بلا سبب وانت تغليه
روحه عساها يالغلا دون رده
خله على هجره وخل المشاريه
خله ولو انه بيشقيك صده
حبٍ بليا وصل لا تنخدع فيه
وبابٍ يجي ريح العنا منه سده
محظوظ ياقلبن بلا حب محييه
ريح الربيع وطيره اللي يهده
- الشاعر/ عبدالله داوود العصيمي