عورة العقل

عطاالله ممدوح

للعقل عوره مثل ما للجسد عوره
كم من عقول بثوب الصمت مستوره
حتى تفوّه بما يكشف خوافيها
شيٍ مايستره (دشداشه) و(كندوره)
ياليت بعض البشر يبقى على صمته
ويموت سامج كلامه وسط حنجوره
ماودك انك تشوفه قبل تسمع له
يعجبك في وقفته واللبس والصوره
وليا تكلم عسى ماينولد مثله
بين الرفاقه ولا بديار (أخو نوره)
ياصاحبي عطني عيونك قبل سمعك
واسمع من محدثك ماخالج شعوره
كلام الانسان ناتج عن قناعاته
وقناعته جزء من فكره ومنظوره
والناس تحكم عليك بماتلفظ به
وانت اختر اللي تحسّ يناسبك دوره
اما مع اللي مكانتهم على الهامش
والا مع اللي يشير وينوخذ شوره
كم واحد نفرح بشوفه ونسعد به
وكم واحد غيبته احسن من حضوره
ياصاحب العقل وش هي فايدة عقلك
اذا يقودك عقل غيرك ودستوره