قصة غرامي

ما كل شخص يقدّر اللي وفاله
وما كل شخص إن ما وفى صار كذاب
كلٍ مشى دربه على ما بداله
وكلٍ له ظروفه وكلٍ له أسباب
بعض البشر عايش على قد حاله
وكرامته تسوى لها عنده أرقاب
وبعض البشر ما يرفعه غير ماله
مطلوب بس المال خلاّه طلاّب
يا حظ طايح ليه وأصبحت عاله
وقفت مع ضيم الدهر مثل الأصحاب
شاعر ويشكي بعض ممّا جراله
من هالزمن والناس وجروح الأقراب
على دروب الشعر وأهل الجزاله
كسبت فيه أذواق وقلوب وإعجاب
وعشرة ضعيف النفس وأهل النذاله
مترفعٍ عنها وأنا توني شاب
بسكّر الموضوع وأنهي جداله
وأبدخل بموضوع مزيون الأهداب
اللي تباهى في حلاه وجماله
دكّ الحصون وما حسب أية حساب
اللي استباح بخافقي ما هناله
خلٍ سطى بعروق قلبي ولا هاب
مجروح وأسعى من غلاه لو صاله
وأجيه وأرجع لكن الجرح ما طاب
بعض البشر لا غاب نلقى بداله
وبعض البشر ماله بدايل إذا غاب
اللي أحبه وأعشقه وش جراله
محتار ومتكدّر وضايق ومرتاب
يمكن نوايا البعد صارت في باله
يمكن يسافر للجفا هجر وغياب
اللي يبيع الحب مالي وماله
للوصل باب وللجفا عشرة أبواب
قصة غرامي كلها في عُجاله
بديت أحبه والنهايات منصاب
الشاعر/ متعب الثقيل