لوحة

والشين من لاحلام.. صد المحبين
نومٍ طويلٍ عمره اشهور واعوام
وان قمت.. فافهمها فراق وسهر عين
وانا رقدت وعمري اربع تعش عام
وصحيت في شهر اربعة عام الالفين
نومٍ ثقيلٍ كله احلام واوهام
ونصيبي من احلامه الجانب الشين
صحّى الفراق قلوب في عكسه.. نيام
وغاب الفرح وانا بعكسه الى الحين
ياحزن كبدي حزن من ضاق ثم حام
وخذت فروخه مادرى ليه ولوين؟
بعد ما شاف العش عيدان وعظام
خالي.. تفكر فوق ويسار.. ويمين
خلا عشاها فيه ومن الوطى شام
زبن على روحه وفل الجناحين
وياوجد حالي وجد من نام ثم قام
على صياح امه وهو دون رجلين
عويق وامه تنعته والنعت سام
وهو خابر انه يقسم الصف صفين
حبا.. وصاح بصيحةٍ تاصل الشام
منها تقطّع في خفوقه شرايين
على وليفٍ قسّم ظنوني اقسام
واقفى وانا ما اعرف طرد المقفين
راح وترك في صدري وسوم واعلام
ووصى علي طيفه وقفى بقلبين
ليته تعذّر كان ماهو بمنّلام
بعد ماشاف الدرب بيصير دربين
اشوى عليه شوي.. من عض الابهام
واشوى علي شوي.. من دمعة البين
تمشي بنا الاقدام والموت قدام
وميعادنا يامفرّق اثنين بعدين
ياعين لا تبكين وعيونه تنام
عادش الى ما خاب ظني بترضين
لو الدموع اتفيد فادن الايتام
ولو الكلام يفيد عادت فلسطين
ولو النبات يطّلعه دمعة هيام
شفتوا على وجهي ورود وبساتين
الحب سجن.. وبعد الاحباب الاعدام
وقلوبنا السجّان مدري مساجين
الحب نومٍ عمره اشهور واعوام
وان قمت فافهمها فراق وسهر عين
وانا تراي انعست من مدة ايام
لا احدٍ يصحيني يالاقدار.. تكفين
محمد بن فطيس