(شرفة الضي)

كفي بكف الشعر في شرفة الضي=واسمع غطاريف القلوب النقيه
ماجات بي موجه ترَاقص بحر غي=خطوي سمو، وعرشي الأبجدية
جذري حفر في القاع يبحث عن المي= وتمتد أغصاني وتكسيه فيّه
ودربي صحاح وهمتي مالها زي=ما اختار غير"اول"لعزمي مطية
وغيمن يسد الشمس ويشح بالري=يا لله عساه بريحْ صرصرْ عتيّة
وإليا تلوى من فطوره لحم ني=وياشين من زاده مقفى خويه
لعقة عسل من شعرنا تشفي العي=وإن حار فيه الطب يبشر بكيه
الله شرع والله يحاسب على أي=أفعال تسبق في السراير بنيه
منطق سفانه عز وانجى بني طي=وخلّد تماضر مدح أسمى البرية
إيه ابدوية وأحلب المزن بيدي=واستبشر برعده وأعنّ لدويه
وازرع بذور الخير واستسقي الحي=في ربوةٍ فيها المعاني عذية
ما ودي اخرج من جهادي بلاشي=أقلها والنعم بالاحمدية
افخر بحرب وكل مسلم لنا خي=نمشي بهدي الله وسنة نبيه
وامسك ذراعٍ حيَّرت قوته لَيّ=والحق غاية للنفوس الابية
لو راودتك الريح عن مبدأك عي=يا طود تحرج هيبته جاذبية
ومن يحرم اغصان الشجر وجبة الضي= لا ينتظر حلو الثمر في العشية