احد اشقائي مشارك في شاعر المليون

احد اشقائي شارك في شاعر المليون وكان هدفه انه يشتهر ويحسن من وضعه المادي .. فبعد مشاركته قررت ان اقف معه وقفت الشهم الشجاع وان اجمع كل ما لدي من مال واقوم بالتصويت له املاً بان يفوز ( بالبيرق ) او حتى يتقدم الى مراحل متقدمه.. فانا لا اجد المال الكثير حتى استطيع حسم الموقف لوحدي فا استنجدت في اقاربي واصدقائي وكل ما اعرف حتى انه وصل بي الحد ان اقف بعد كل صلاة عند المسجد الحي الذي اسكنه واستنجد بالمصلين بالتصويت لشقيقي في شاعر المليون .. عندها تبادر في ذهني ان اقترض من احد البنوك مبلغ واجمع بطاقات اتصال واصوت بها لاخي وبالفعل حدث ذالك وكله تحت شعار ( هذا اخوي لازم اوقف معه ) وفي ذات يوم وقفت امام حشود من المعازيم عند احد اقاربي في استراحه .. حتى اقوم بتوزيع البطاقات واطلب منهم التصويت لشقيقي .. فمنهم من صوت من جواله وهدفه الوقوف معي واخي ، فتقدم احد كبار السن وسألني سؤال ؟؟
فقال لي
بعد ان تقدم حتى وقف بجانبي
****** : اسمع ياولدي
انا : سم طال عمرك .
****** : الفلوس الي تجمعها تروح ل اخوك .. يعني ياخذه اخوك بجيبه ؟؟
انا : لا طبعا هذا يروح الى ادارة البرنامج
****** : المال هذا ليش ما تجمعه وتعطيه اخوك او تصدق فيه في بناء مسجد او مساعدة مريض ؟؟
انا : يا طويل العمر هذا اخوي ولازم اوقف معه وإلا ما يصير فيني خير !!
****** : طيب انت تظمن انه لو صوتوا الناس كلهم لخوك انه بياخذ البيرق ؟؟
انا : لا والله ما اضمن
****** : ليش ؟؟
انا : لان الموضوع بيد ادارة شاعر المليون وبعدين ما اثق انه يجي واحد اكثر تصويت وياخذ البيرق
****** : طيب اخوك شاعر قوي ؟؟
انا : الكل يشهد له بالشعر ولكن هذا ما يؤهله للفوز لان الفوز قائم على التصويت
****** : طيب اذا صرت تعرف انه ما يؤهله للفوز ليش هالفلوس تضيعها وتحرم نفسك وعيالك منها وتسلمها لناس ما تعبوا فيها ؟؟
انا : والله مدري يا عم ولكن الناس يقولون تصويت وانا معهم ابي اصوت لخوي
****** : يا ولدي الواحد ما يعير عقله لغيره .. ماهو اذا ضاع بعض الخلق تضيع معه وانت ما تدري !!
انا : ايه ياعم بس هذا اخوي واذا ما وقفت معه اليوم متى اقف معه ؟؟
****** : ياولدي اجمع الفلوس اللي بيصوتون فيها ربعك وعطها اخوك وكذا تكون الفائده لخوك بدل ما تروح فلوسنا برا ولا تستفيد منها انت ولا وطنك !!
انا : طيب وين الحميا .. وين الوقفه مع القريب ؟؟
****** : الحميا ياولدي بوقفت الرجال مع ربعه في المواقف الصعبه وقفت ربعه معه يوم يصير عليه شئ كبير ان كان دين او شئ من هالمور حمانا الله واياكم منها .. اما بشاعر المليون هذي ما هي وقفه هذي تبذير وانا عمك !!
انا : طيب ياعم الحين فيه ناس تصوت لشعّار ماهم من ربعهم حتى بعضهم يخسر نص راتبه علشان التصويت !!
****** : ياولدي والله هاللي يصوتون له لو يروح واحد منهم و يطلب منه المساعده في دفع مساعده في رقبه انه غير يتعذر وان عطاك ؟؟ اعطاك 100 ريال وقال انا وش دخلني بالناس .. اعطيه جمعته وخله يمشي حتى لو كان قادر على عتق رقبه لوحده ما رايح يعطيك !!
انا : والله انك صادق يا عم .. بصراحه انت الحين خليتني اعيد حساباتي من جديد وافكر بصدق
****** : ياولدي اول شئ استغفر ربك ، لانه والله اعلم التصويت هذا يدخل في الميسر وانت تدري ان الميسر حرام ، والشئ المهم ياولدي ان التصويت هذا اول شئ يضر بالوطن وثانياً يرجع عليك بالخساره فاستغفر ربك وفلوسك عطها اخوك او تصدق بها لمستحق لو كانت عشرة ريالات تزود لك عشرات الاضعاف وترجع لك بالآخره بالحسنات ويمكن ما يدخلك الجنة بعد رحمة رب العالمين إلا هالعشرة !! اعرف ياولدي ان المسلم يوم القيامة بحاجة لحسنة واحده .. فلا تستحقر شئ تقدمه لله
انا : جزاك الله خير ياعم .. الله ينور دربك
****** : طيب انا بسألك ياولد ؟ الناس اللي صوتوا لشاعر الميون السنين اللي راحت استفادوا شئ ؟؟
انا : بعلمك .. يقولي زميلي .. والله اني اتصلت على شاعر بعد فترة وعرفته بنفسي وقلت له انا من صوت لك وترانا قمنا بالواجب واكثر ولكن ما حالفنا الحظ وخيرها بغيرها .. يقول المهم قلت له انا عندي موضوع كذا وكذا وابي مساعدتك وتكفى لا تخليني والموضوع بسيط فقط يحتاج لحظورك .. يقولي : قالي ابشر بس اتصل علي بعدين ولا يصير خاطرك إلا طيب .. المهم يقول يوم جاء الموعد ما شفت له طريق ومثلي مثل غيري مع العلم انه قادر على مساعدتي وهي شغله بسيطه لا تذكر . من بعدها عرفت اننا ضحية ضحكة انضحك علينا فيها تحت شعار ( صوت لبن قبيلتك ) ..
****** : انا قلت لك ياولدي قبل شوي انه التصويت هذا حظ للي مستقبل هالفلوس ولا يصوّت رجل عاقل .. اذا تبي تنفع رفيقك اتصل عليه وحول المبلغ له مثل ما فعل بعض التجار مع ربعهم يوم حول للشاعر مليون وقال هذا مليونك ان فزت وان ما فزت تستاهل انك مثلت ربعك .. هذا الشغل الزين انه يعطي رفيقه ما يروح يودعها بحساب الناس الي برا !!
انا : والله انك صادق ياعم والحين انا قررت اني اتصل على اخوي يرجع
****** : لا لا.. لا تتصل على اخوك خله في طريقه واذا الله كاتب له الفوز بيفوز بدون تصويتك ياولدي .. يلقى من يصوت له غيرك
انا : يا عم العشى غرفوه وقلطوا الرجال
****** : هاااه .. يالله ياولدي اخذتنا السوالف
ذهب هذا ****** وكلامه كالسهام في قلبي واتفكر بها واحلل كل كلمه قالها واتخيل ما جرى له من السنين التي علمته الحياة بدروسها وتجاربه يوم بعد يوم .. وجدت ان في كلامه درر ، والسنين علمته الحلوة والمره .. الصح والغلط .. اول شئ دال بخاطره هو الدّين وما نص عليه القرآن والاحاديث النبوية .. بعدين نصيحته حسيت انها خرجت من القلب ووصلت الى القلب مباشرة
بعدها ..
تذكرت حديث النبي صلى الله عليه وسلم ( لا تزول قدما عبد يوم القيامة حتى يسأل عن أربع : عن عمره فيما أفناه وعن علمه ماذا عمل فيه وعن ماله من أين اكتسبه وفيما أنفقه وعن جسمه فيما أبلاه )
سالت نفسي هل ناخذ بكلام عقلائنا ؟؟
عندها ناداني صاحب الوليمه ....
الله وحده اعلم !!
واقع من خيالي ..
محمد السالمي