بسم الذي يعلم مواعيد الاقدار سبحانه اللي عالم بالسريره ندعيه ونصلي له إجلال وإكبار ولبيته تحج الجموع الغفيره يا فكر لا تبخل علينا بالاشعار عطنا الجزل بحماة شبه الجزيره اللي على حد الوطن درع وسوار صدورً ترحب بضرب الذخيره ما حسبت للموت تاطا على النار مثل السباع الضاريات المغيره ما يعرفون الخوف لله والاخطار روسً تقادح بالسطر زود غيره لأجل الشهاده والوطن تهدي الاعمار الموت عز ولا ارتضت بالكسيره جنود جيشً عندهم عزم وإصرار الكل منهم نادرً من عشيره أبطالً تروم العلا مثل الأحرار ما كلّوا وملّوا عيونً سهيره فقلوبهم حب الوطن سر وجهار تغامر لنصر الوطن وتحريره تفرض على العدوان بالقوه حصار وتظهر خفافيش الظلام الستيره اللي تخطط كل يومً لها أعذار يوم أن نور النصر بشر بشيره في رأي أخو نورة ملك كل الأقطار العالم بحكمته كله يديره يفره بريموت ليمين ويسار وتجيه قادات الدول تستشيره كم خضّع عروشً سلاطينها كبار بحَكْمة اسياسته تصبح صغيره هذا ملكنا اللي ترد له الأشوار لا اختلطت الاريا وصارت محيره يقدح وياخذ من سطر راسه اقرار ويخلي طوال الدعاوي قصيره سلمان ياللي لك مع الشعب مقدار إمام للدين الحنيف ونصيره دين على أعلام الوطن سجل شعار باللون الأخضر فوق رفرف حريره ما نكس اسم الله معه سيد الابرار محمد الهادي من الله نذيره والسيف رمزً للوطن يدرا الأخطار مطبقً شرعه ومحيي الشعيره حده على العاصي شرعه الله اجبار يجلي ذنوب المبتلين وطهيره الدين عزً للبلد حفظ واعمار منهاج واضح مارضينا بغيره منزه من الله صمد فوق جبار دستور للمسلم نجاه وبريره أبوفهد حنا معه وين ماسار فالبر ولا فالبحور الغزيره هو قايد الأمة سعد كل محتار يمينه محمد سنده وشويره ولي عهده نايبً عنه فالدار عضيد أبوه مرافقه في مسيره أميرنا اللي كنه السيف بتار زعيم حلال الأمور العسيره يابن الملك سلمان لك هيبه وكار هيبة ملوك ومن وجيه سفيره من عزوة العوجا هل سيوف ومهار تلطم مثل موج تزايد هديره في يدك سيف المجد ما عنه معذار انته سموا الطيب عزه واميره جدك مؤسس له مكانه وتعبار يا محمد انته رقم صعب اتغييره الرقم الأول واحد يسارك اصفار الطيب كله يا محمد سفيره يا طويق يالنير المسمى وسنجار سموك شعبك بالجبال الشهيره يامهندس الرؤيه لك أفعال وأدوار حققت حلم الشعب عندك بصيره للتقنيه ف بلادنا مركز إصدار استقطب الابداع وأحظر خبيره طوره للافضل بتنظيم بيطار صروح علمً بالكفاءة جديره ومصانع العالم تسابق ويختار اسمك حليف للنجاح ومديره فوز وتفوق فايق كل الأطوار أبدعت يا الملهم وقدت المسيره بادرت لبلادك ونفذت لأفكار ما له شبيهً منقطع في نظيره وأعد وأعاد البيئه أشجار وأنهار عادت عقب فقدت سنينً كثيره من عقب ما قصت روايات لصغار عن ماضي عاشوا حلاه ومريره اليوم خليته حقيقه للأنظار عان الظبا ترعى شمال الزبيره ويرعن فالصمان في روض الازهار ومحمية الإمام تارد غديره أحيا الطبيعة والفضاء أرسل له أقمار جاورت بالرؤية نجومً منيره العالم أدهشته من إبداعك احتار إنجاز وأحداثً عظامً مثيره أذهلتهم وارعبتهم مثل الاعصار وعصفت بالحساد قومً شريره نفضتهم عن دارنا نفضة غبار وقطعت روسً للحيايا خطيره حكامنا والنعم يا طوال الاشبار يا ذخرنا يا أهل السيوف الشطيره دار السعود الريف لبعيد والجار مزبان لاجات الأمور الكبيره دخيلها يامن ولو صار ما صار في بشوت حكام ذراها يجيره يا دار جعلك ماتذوقين الأكدار تبقين لجل الشعب عينً قريره قلت الحقيقه واعلنوها فالأخبار ما يشبه دياري على الأرض ديره أقولها مره وثنتين ومرار ويقول مثلي مخلص من ضميره يا الله تكفي بلادنا كيد الأشرار الكون عندك يا إلهي مصيره ارحم معزي وأسكنه دار الأخيار اجعله فالجنه محمد جويره وحد قبايل مملكتنا فالاقفار توحدوا وأصبح عدوه قصيره تصافوا ولا عاد به حرب وثار حكمك يابو تركي على الناس خيره..
